Бразилияның бұрынғы президенті Дилма Руссефф ауруханаға түсіп қалды

АСТАНА. KAZINFORM – БРИКС елдері құрған Жаңа Даму Банкінің (ЖДБ) басшысы, Бразилияның бұрынғы президенті Дилма Руссефф сырқатына байланысты Шанхай ауруханасына жатқызылды, деп хабарлайды ТАСС ақпарат агенттігі.

Бұл туралы бразилиялық депутат Жозе Гимарайнш хабарлады.

— Дәрігерлер ауыр деп санамайтын сырқаттан айығып, Шанхайда емделіп жатқан біздің (бұрынғы) президентіміз Дилма Руссефтің тезірек сауығып кетуін тілеймін, - деп жазды ол X әлеуметтік желісінде. 

Folha de S. Paulo газетінің мәліметінше, Руссефф құсу, бас айналу және қан қысымының көтерілуіне шағымданып, ауруханаға жеткізілген.

Еске сала кетсек, Бразилия 1 қаңтардан бастап БРИКС-ке төрағалық етті. Рио-де-Жанейрода 6-7 шілде аралығында БРИКС саммиті өтеді.