Бірінші лига: «Қайрат-2» командасы үшінші орынға көтерілді

АСТАНА. KAZINFORM – Футболдан Бірінші лига командалары арасындағы Қазақстан біріншілігінің XVІ турының алғашқы ойын күні өтті.

Айта кетсек, 18 шілдеде Алматының «Қайрат-2» командасы өз алаңында Жезқазғанның «Ұлытауын» қабылдаған еді. 

Жыл басында «Ұлытау» Премьер-лига жолдамасынан үміткер ретінде саналған еді. Десе де әзірге жанкүйер сенімінен шығатын деңгейде ойын көрсете алмай келеді. Жезқазғандық клуб XVІ турда сырт алаңда «Қайрат-2» командасына 1:2 есебімен жол беріп қойды. 

Бұл турдан кейін 26 ұпаймен «Ұлытау» бесінші орында тұрса, «Қайрат-2» 28 ұпаймен үшінші орынға көтерілді.

Ал қызылордалық «Қайсар-2» өз алаңында «Tүркістанды» 2:1 есебімен тізе бүктірді.

Айта кетсек, енді 19 шілдеде «Арыс» (Түркістан облысы) мен «Алтай» (Өскемен), «Жетісай» (Түркістан облысы) мен «Ақтөбе-2» командалары кездеседі.

Еске салсақ, 17 шілдеде Оралдың «Ақжайығы» елордалық «SD Family» командасын 2:1 есебімен жеңсе, ақтаулық «Каспий» «Оқжетпеске», «Тараз» алматылық «Хан Тәңіріне» 0:1 есебімен жол берді.