АСТАНА. KAZINFORM - Футболдан Бірінші лиганың ХХV туры тартысқа толы басталды. Көш басында келе жатқан Көкшетаудың «Оқжетпесі» ойламаған жерден сырт алаңда Өскеменнің «Алтай» командасына 0:1 есебімен есе жіберді. Осылайша олар турнир кестесіндегі жағдайын біршама қиындатып алды. Әзірге көш басында тұрғанмен одан кейінгі орындардағы командалар аталған ұжымды өкшелеп қалды.
Біріншіліктің орта тұсына таман ойыны біршама қожырап кеткен Ақтаудың «Каспий» клубы әлі де Қазақстан Премьер-лигасына шығатын мүмкіндігін жоғалтқан жоқ. Сегіз тур бойы жеңілістің ащы дәмін татпаған олар сол сәттілік сериясын бұл жолы да жалғастырды.
Ақтаулық клуб бүгінгі ойында Алматының «Қайрат-2» командасын 4:2 есебімен жеңді. Сондай-ақ аталған турда Оралдың «Ақжайығы» қызылордалық «Қайсар-2» командасын 1:0 есебімен қапы қалдырды.
Енді 20 қыркүйекте «Ақтөбе-2» мен «Арыс» (Түркістан облысы), «Жетісай» (Түркістан облысы) мен «Хан Тәңірі» (Алматы), «Түркістан» мен «SD Family» (Астана), «Екібастұз» (Павлодар облысы) бен «Тараз» командалары кездесу өткізеді.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.