АСТАНА. KAZINFORM — Қазақстанның бірінші, әлемнің 75-ракеткасы Александр Бублик Мадрид (Испания) мастерс турнирінің төртінші айналымына шықты.
Қазақстандық теннисші үшінші айналымда әлемнің 8-ракеткасы, ресейлік Андрей Рублевпен бақ сынасты.
Теннисшілердің екеуі де 27-де, олар жасөспірім кезінен бір-бірін жақсы біледі.
Бірінші партияда Бублик шеберлік танытты — 6:4.
Екіншісінде Рублев артығымен есе қайырды — 6:0.
Шешуші, үшінші сетті қазақстандық спортшы жеңіспен түйіндеді — 6:4.
Бір сағат 22 минутқа созылған бәсеке барысында Бублик 10 эйспен бірге 6 брейк-пойнттың екеуін мүлт жібермеді. Рублев 12 эйс, 3 брейкпен (5 брейк-пойнт) көзге түсті.
Александр Бублик ширек финалға шығу үшін америкалық, әлемнің 13-ракеткасы Бен Шелтон немесе рейтингіде 23-орындағы чехиялық Якуб Меншиктің біреуімен таласады.
Өткен жылы Мадрид мастерс жарысында А.Рублев чемпион атанса, А.Бублик төртінші айналымға дейін жеткен еді.
Еске сала кетейік, бұдан бұрын Анна Данилинаның Мадрид мастерс турнирінің екінші айналымына шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).