Бүгін Парижде басталатын «Ролан Гаррос» турниріне қазақстандық бес теннисші қатысады
Чемпионат.ком сайтынан алынған мәліметке қарағанда, аталмыш жарыс «үлкен дулыға» ретінде күллі әлемге мәлім Уимблдон мен АҚШ чемпионатынан кейін, 1891 жылы ұйымдастырылған осындай жоғары деңгейдегі үшінші турнир екен. Мұнда алдымен тек ерлер ғана күш сынасқан, 1897 жылдан әйелдер де кортқа шыға бастаған. Содан кейін бірінші және екінші дүниежүзілік соғысқа байланысты бірнеше жылға үзіліп қалғаны болмаса, тұрақты ұйымдастырылып келеді.
Биылғы жылдың ең басты жарыстарының бірі саналатын «Роллан Гаррос» турниріне Қазақстаннан бес бірдей теннисші қатысады. Тура екі аптаға созылатын жарыстың алғашқы күні Сюзан Ленглен кортында төртінші кезекпен қазақстандық Ярослава Шведова әлемнің жетінші ракеткасы, сербиялық Ана Ивановичпен шеберлік байқасады.
Еске сала кетейік, Қазақстанның бірінші, әлемнің 32-інші ракеткасы Зарина Диястың бірінші қарсыласы - германиялық, дүниежүзілік рейтингте 142-інші сатыда тұрған Дина Пфиценмайер. Ал Юлия Путинцева (105-інші орында) тағы бір сербиялық Александра Круничпен (85) кортқа шығады.
Ерлер турнирінде Михаил Кукушкин (57) израильдық Дуди Селамен (89), іріктеу сайыстарынан негізгі турнирге өткен Андрей Голубев (137) испандық, әлемдік рейтингте 19-ыншы орындағы Томми Робредомен кездеседі.
«Ролан Гарростың» өткен жылғы жеңімпаздары - ресейлік Мария Шарапова мен испандық Рафаэль Надаль.