Қазақстан Республикасы Қаржы министрінің 2018 жылғы 16 ақпандағы № 206 «Қазақстан Республикасының аумағында жүзеге асыру кезінде салық төлеушілер ақшалай есеп айырысу кезінде деректерді тіркеу және (немесе) беру функциясы бар бақылау-касса машиналарын қолданатын қызмет түрлерін бекіту туралы» бұйрығына енгізілген өзгертулер мен пен толықтырулар күшіне енді.
Аталмыш бұйрық 2019 жылы онлайн-бақылау-кассалық машиналарды қолданатын қызмет түрлерін кеңейтуді көздейді.
ҚР қаржы министрлігінің мемлекеттік кірістер комитетінің хабарлауынша, биыл тоқсан сайынғы негізде 633 қызмет түрі онлайн-бақылау кассалық машиналарын қолдануға көшуі тиіс.
1 сәуірден 323 қызмет түрін, 1 қазаннан бастап 224 қызмет түрін көрсетушілер онлайн-касса арқылы есеп айырысады.
Бір айта кетерлігі, бұл бұйрықтың интернетпен қамтылмаған елді мекендерге қатысы жоқ.
«Онлайн-БКМ қолдану бойынша талаптар телекоммуникация желілері жоқ аумақтарда қызмет көрсететін салық төлеушілерге қолданылмайды. Жалпы бақылау кассалық машиналарды қолдану тәртібі салық кодексінің 166-бабымен реттеледі», - делінген комитеттің ақпаратында.
Кодекске сәйкес, БКМ қолдану талабы төмендегі тұлғалардың ақшалай есеп айырысуына қолданылмайды:
1) жеке тұлғалар;
2) адвокаттар мен медиаторлар;
3) акцизделетін тауарларды өткізушілерден басқа жеке кәсіпкерлерге
патент бойынша жұмыс істейтін кәсіпкерлерге 2020 жылдың 1 қаңтарына дейін;
бірыңғай жер салығын төлеу негізінде арнайы салық режимі шеңберінде 2020 жылдың 1 қаңтарына дейін;
4) билет бере отырып, қалалық қоғамдық көлікте тасымалдау бойынша халыққа қызмет көрсету бөлігінде;
5) Қазақстан Республикасы ұлттық банкіне;
6) екінші деңгейдегі банктерге.