ӨСКЕМЕН. ҚазАқпарат – Шығыс Қазақстан облысы Күршім ауданындағы Бұқтырма су қоймасында 4 көлікпен мұз үстімен жүріп өтпек болған тұрғындар эвакуацияланды, деп хабарлайды ҚазАқпарат.
ШҚО ТЖД баспасөз қызметінің мәліметіне сүйенсек, оқиға 23 ақпанда сағат 16.20 шамасында орын алған. Октябрь және Қаракөл ауылдарының арасындағы рұқсат етілмеген өткелден 4 көлікке отырып жүріп өтпек болған тұрғындар қар құрсауында қалған.
«Оқиға орнына дереу жеткен құтқарушылар тоғыз адамды эвакуациялады. Көліктер Октябрь ауылына жеткізілді. Құтқару жұмыстары төрт сағатқа созылған. Зардап шеккен ешкім жоқ», - деп хабарлады ведомство өкілдері.
Естеріңізге сала кетсек, осыған дейін Бұқтырма қоймасында екі көліктің мұз астына түсіп кеткені хабарланған болатын.
Талғатжан Мұхаметбекұлы
Өскемендегі С.Аманжолов атындағы ШҚУ-ды "Журналистика" мамандығы бойынша тәмамдаған. Еңбек жолын 2015 жылы ШҚО "Алдаспан" газетінде тілші болып бастады. ШҚО "Менің өлкем" газетінде тілші, республикалық "Жас қазақ", "Заң" газеттерінде Шығыс Қазақстан облысы бойынша меншікті тілші, ШҚО "Менің өлкем" газетінің бас редакторы қызметтерін атқарған. Kazinform агенттігінде 2021 жылдан бері жұмыс істеп келеді.