Қазақстандық спортшы финалдық сын қиын болғанын жасырмады.
— Жарыс жақсы өтті. Біз жүлде жеңіп алу үшін көп дайындалдық, өзімізге сенімді болдық. Себебі әйелдер арасында біз Азияның алдыңғы қатарындамыз. Командалық сында Қытай құрамасына есе жіберіп, күміс жүлде қанжығаладық, — деді ол.
Әсем Орынбай жекелей сындағы қарсыластары туралы айтты.
— Қытай қызы — мықты қарсылас. Осыған дейінде финалда бірге өнер көрсетіп жүрміз. Жалпы, Азия ойындарындағы бәсеке жоғары болды, — деді спортшы.
Қазақстандық спортшы төрешілер шешіміне қатысты да ойын айтты.
— Тайланд өкілінің соңғы екі оғы есепке алынды. Төрешілер тиді деп есептесе, шешім солай болғаны. Алайда өзім оқтың тигенін көрмедім, — деді Әсем.
Осыған дейін хабарлағанымыздай, Қазақстан әйелдер құрамасы стенд атудан Азия ойындарында күміс жүлде жеңіп алды.
Сонымен қатар Әсем Орынбай жекелей сында қола жүлде еншіледі.