АСТАНА. KAZINFORM – Бокстан Қазақстан әйелдер командасы Алматы облысындағы «Ақбұлақ» Олимпиада орталығында лицензиялық турнирге жаттығу жиындарын бастап кетті. ҚР Бокс федерациясы баспасөз қызметі мәлім еткендей, бұл Елдос Сайдалиннің бас бапкер ретіндегі алғашқы жаттығу жиыны.
Жаттығу жиынының басты мақсаты — боксшы қыздарды Таиландтағы лицензиялық турнирге бабында апару.
Естеріңізде болса 29 ақпан пен 12 наурыз аралығында Италиядағы өткен іріктеу турнирінде бұрымды боксшыларымыздың барлығы жолдамаға қол жеткізе алмаған. Осы сәтсіздіктен кейін бұрымды боксшылар арасында Таиландтағы соңғы іріктеу турниріне қатысатын боксшылар Астанадағы спаррингтік жарыста анықталды.
Жарыс қорытындысы бойынша Назым Қызайбай (50 келі), Ұлжан Сәрсенбек (54 келі), Наталья Богданова (66 келі), Валентина Хальзова (75 келі) Олимпиадаға іріктеу турнирінде бақ сынау мүмкіндігіне қол жеткізді.
Енді осы аты аталған боксшы қыздар Таиландтағы соңғы іріктеу турниріне барады.
Күнсұлтан Отарбай
Еуразия Ұлттық университетінің түлегі. Республикалық «Қазақ спорты», «Sport» газеттерінде қызмет атқарған.
2014 жылғы Сочи, 2016 жылғы Рио-Де Жанейро, 2017 жылғы Инчхон және 2024 жылғы Париж Олимпиадасында, сонымен қатар бір қанша Қысқы және Жазғы Азия ойындарынан, әлем біріншіліктеріне барып тікелей хабар таратқан журналист.
Сейдақмет Бердіқұлов атындағы арнайы сыйлықтың лауреаты.