«Бүркіт» арнайы жасағы Жаңаөзенде есірткі саудасымен айналысқан адамды ұстады

АҚТАУ. KAZINFORM – 16 ақпанда Маңғыстау облыстық полиция департаментінің мәліметінше, 7 ақпан күні сағат шамамен 18:10-да есірткіге қарсы күрес басқармасының қызметкерлері кинологиялық орталық пен «Бүркіт» арнайы жасағының қолдауымен, сондай-ақ өңір прокуратурасының үйлестіруімен жедел-іздестіру жұмысын өткізді. Іс-шара барысында Кира атты қызметтік ит пайдаланылды.

– Заңсыз есірткі айналымына қатысы бар азамат ұсталды. Тексеру барысында оның қолынан «апиын» есірткісі салынған 4 орам табылды. Сондай-ақ тұрғылықты жерін тінту кезінде тағы 5 орам апиын, электронды таразы, спутниктік байланыс құралы, GPS құрылғысы, далалық көзілдірік (бинокль) және үлкен көлемдегі ақша табылды. Сараптама қорытындысына сәйкес, заңсыз айналымнан тәркіленген опийдің жалпы салмағы 273,14 граммды құрады, - делінген хабарламада. 

Медициналық куәландыру барысында ұсталған адамның есірткі қолданғаны расталды. Оған қатысты Қазақстан Республикасы Әкімшілік құқық бұзушылық кодексінің 440-1-бабы (есірткі, психотропты заттар, олардың аналогтары және күшті әсер ететін заттарды медицинаға жатпай тұтыну) бойынша әкімшілік хаттама толтырылды.

Осы оқиға бойынша Қазақстан Республикасы Қылмыстық кодексінің 297-бабының 2-бөлігі (үлкен мөлшерде немесе сату мақсатында есірткі заттарын заңсыз сақтау) бойынша тергеу жұмыстары басталды.

Күдікті уақытша ұстау изоляторына қамалды. Қазіргі уақытта қажетті тергеу шаралары жүргізіліп жатыр. 

Бұған дейін, Тәжік-ауған шекарасында ірі көлемдегі есірткі партиясы тоқтатылған болатын.