Бұрынғы төрағаға қатысты қылмыстық іс аяқталды - қаржы полициясы

АСТАНА. Қыркүйектің 3-і. ҚазАқпарат /Гүлнәр Жандағұлова/ - Экономикалық қылмысқа және сыбайлас жемқорлыққа қарсы агенттік мемлекет қаржысын талан-таражға салды деп айыпталып отырған Ауыл шаруашылығы министрлігінің Агроөнеркәсіптік кешендегі мемлекеттік инспекция комитетінің бұрынғы төрағасына қатысты қылмыстық істі аяқтады, деп хабарлады бүгін елордада өткен баспасөз мәслихатында қаржы полициясының ресми өкілі Мұрат Жұманбай.

«Агенттік Серік Сүлейменовтың үстінен қозғалған қылмыстық істің өндірісін аяқтады, айыпталушы қазір іс материалдарымен танысуда», деді М.Жұманбай өз сөзінде.

С.Сүлейменов 68,2 миллион теңге соманың (465 мың доллар) 5,2 мың тонна астығының шіріп кетуіне және 168 миллион теңге соманың (1,1 миллион доллар) 7 мың тонна көлеміндегі астықтың талан-тараж болуына жанама қатысы бар деп айыпталған болатын. Шенеунік іс насырға шаппай тұрып, осы фактілерді тексерген қаржы полициясының қызметкеріне мамырдың 15-інде 50 мың пара ұсынып, істі жылы жауып тастамақшы болған. Шенеунік мамырдың 22-сінде ақша беру үстінде, бұлтартпас айғақпен ұсталды. Келесі күні сот санкциясымен қамауға алынды.

Келесі күні Сүлейменовтың кабинетін тінту кезінде оның сейфінен 123,4 мың доллар және 5,4 миллион теңге ақша табылған және тәркіленген.

«Сүлейменов қамауға алынғаннан кейін Агенттікке кәсіпкерлерден шенеуніктің рейдерлік әрекеттері мен оның тұрақты пара алып отырғандығы туралы басқа да арыз-шағымдар түсті. Бүгінде қолданыстағы қылмыстық іс жүргізу заңнамасына сәйкес, сол шағымдар бойынша тексерулер жүргізіліп жатыр, олардың қорытындысы бойынша процессуалдық шешім қабылданатын болады»,- деп атап көрсетті қаржы полициясының ресми өкілі М.Жұманбай.