БҰҰ 2026 жылы Ауғанстандағы аштық дағдарысы ушығады деп ескертеді

АСТАНА. KAZINFORM — Біріккен Ұлттар Ұйымының Гуманитарлық мәселелерді үйлестіру басқармасы (OCHA) гуманитарлық серіктестермен бірлесіп, 2026 жылға арналған Ауғанстан бойынша гуманитарлық қажеттіліктер мен әрекет ету жоспарын іске қосты, деп хабарлайды АЗЕРТАДЖ.

Ұйымның мәлімдеуінше, құжаттың мақсаты – халықтың шұғыл қажеттіліктерін қанағаттандыру және елдегі гуманитарлық дағдарыстың одан әрі ушығуына жол бермеу.

OCHA Ауғанстан Судан мен Йеменнен кейінгі әлемдегі ең ірі гуманитарлық дағдарыстардың бірін бастан кешіріп отырғанын атап өтті.

Болжам бойынша, 2026 жылы шамамен 21,9 миллион адам, яғни ел халқының жартысына жуығы, гуманитарлық көмекке мұқтаж болады.

Баяндамада айтылғандай, азық-түлік қауіпсіздігінің болмауы гуманитарлық қажеттіліктердің басты себебі болып отыр. Шамамен 17,4 миллион адам азық-түлік тапшылығына тап болады деп күтілуде. Ал 4,7 миллион адам төтенше жағдай деңгейіндегі аштықты бастан өткеруі мүмкін.

Ұйым дағдарысты ушықтырып отырған негізгі факторлар ретінде құрғақшылықты, климаттық күйзелістерді, күнкөріс көздерінің жойылуын және ауған мигранттарының жаппай оралуын атады.

Сонымен қатар төтенше деңгейдегі аштық көрсеткіші өткен жылмен салыстырғанда 50 пайыздан астам артқаны айтылды.

Жалпы бюджеті 1,71 миллиард доллар болатын жоспар 17,5 миллион адамға көмек көрсетуді көздейді. Әсіресе табиғи апаттардан, соның ішінде құрғақшылықтан, босқындардың жаппай оралуынан, аурулардың өршуінен, жер сілкіністері мен басқа да апаттардан ең көп зардап шеккен аймақтарға басымдық беріледі. 

Айта кетелік Ауғанстанда қалың қар мен нөсер салдарынан 61 адам көз жұмған еді.