БҰҰ Бас хатшысы Израильдің Сирияға жасаған әуе соққыларына алаңдаулы

АСТАНА. KAZINFORM – БҰҰ Бас хатшысы Антониу Гутерриш Сирияның егемендігі мен аумақтық тұтастығының соңғы уақыттағы кең көлемді бұзылуына «терең алаңдаушылық» білдіріп, елдегі барлық тараптарды зорлық-зомбылықты бәсеңдетуге шақырды. Бұл туралы бейсенбі күні күнделікті брифингте оның ресми өкілі Стефан Дюжаррик мәлімдеді, деп хабарлайды Синьхуа ақпарат агенттігі. 

Антониу Гутерриш шиеленісті бәсеңдетуге шақырды.

— Бас хатшы Израильдің Сириядағы бірнеше аймаққа жасаған жүздеген әуе соққыларына ерекше алаңдаушылық білдіріп, елдегі барлық майдандарда зорлық-зомбылықты бәсеңдетудің аса қажет екенін атап өтеді, — деді ол. 

Антониу Гутерриш 1974 жылғы күштерді ажырату туралы келісімнің әлі де күшінде екенін еске салып, осы құжатқа сәйкес келмейтін барлық әрекеттерді айыптады. Ол келісім тараптарын өз міндеттемелерін орындауға, соның ішінде ажырату аймағындағы заңсыз қатысуды толық тоқтатуға және атысты тоқтату режимі мен Голан жоталарындағы тұрақтылықты бұзатын кез келген әрекеттерден бас тартуға шақырды.

Стефан Дюжарриктің айтуынша, Бас хатшы жылдам өзгерістер кезеңінде қоғамдық тәртіпті сақтап, Сирияда сенімді, реттелген және инклюзивті өтпелі тетіктерді қолдау қажеттігін атап өтті.