Бюджеттегі өзгеріс: ауылдың кірісі үш есеге артады

АСТАНА. KAZINFORM – Бірнеше төлем түрі ауыл бюджетінің пайдасына аударылады. Бұл туралы елордада Сенат жанындағы мәслихаттармен өзара іс-қимыл жөніндегі кеңестің отырысында Премьер-Министрдің орынбасары Ермек Көшербаев мәлім етті.

- Ауылдық округтер бюджетінің кіріс көздері кеңейіп келеді. Жаңа Бюджет кодексінің аясында кең таралған пайдалы қазбалар бойынша осы қазбаларды өндіру салығы аударылды. Төлемдердің тағы 4 түрін аудару жоспарланған. Бұл тұрғыда заңды тұлғалар мен жеке кәсіпкерлер мүлкіне салынатын салық, су ресурстарын пайдаланғаны үшін төлем, жекелеген қызмет түрлерімен айналысу құқығы үшін лицензиялық алым, лицензияны пайдаланғаны үшін алым ескерілген. Осы орайда ауылдың кірісі үш есеге артады, - деді Е. Көшербаев.

Оның айтуынша, бюджет процестерін жеңілдету үшін ауылдық округтердің бюджеттік бағдарламаларын 17-ден 4 түріне дейін ірілендіру жоспарланған. Бұл өз кезегінде бюджеттік түзетулерді 2 айдан үш күнге дейін қысқартады.

- Біздің ойымызша, жаңа Бюджет кодексі қоғамның сұранысын қанағаттандырып, үнемді әрі жауапты бюджет саясатын жүзеге асыруға септігін тигізеді, - деді вице-премьер.

Бұдан бұрын хабарланғандай, биыл ауылдарда мамандарды баспанамен қамтамасыз етуге 25 млрд теңге қарастырылған.