Айта кетейік, Дирекция қызметтік ғимараттарды пайдаланумен, техникалық қызмет көрсетумен және ҚР Президенті Әкімшілігі мен Үкіметін жабдықтаумен айналысады.
Дирекцияның кадр жұмысы бөлімі басшысының орынбасары Диас Мухамедиярдың айтуынша, жәрмеңкеде 16 мамандық бойынша жұмыс орындары ұсынылған. Бүгінде дирекцияға инженер, менеджер, слесарь, тасымалдаушы, аспаз, тазалаушы сияқты мамандар қажет.
«Қызмет көрсетілетін жаңа нысандар пайда болғандықтан кадр қажеттілігінің сезілуі заңдылық. Бұл ретте, қатарымызға жұмысқа қабілетті, біліктілігі жоғары іскер мамандарды қосқымыз келеді. Орташа есеппен 50-60 маманды жұмыспен қамтуға дайынбыз. Квазимемлекеттік сектор бағытындағы мекеме болғандықтан, жұмыскерлерді толық әлеуметтік пакетпен қамтамасыз етеміз», - деді ол.
Белгілі болғандай, Дирекция жыл басынан бері 2 бос жұмыс орындары жәрмеңкесіне қатысқан. Атап айтсақ, 26 сәуірде Л. Н. Гумилев атындағы Еуразия ұлттық университетінің мансаптық орталығының шақыруымен Дирекция мамандары оқу орнының соңғы курстарының түлектері мен студенттері үшін ұйымдастырылған жәрмеңкеде төбе көрсетті. Нәтижесінде 25 түйіндеме иелерімен сұхбат өткізілген.
Ал, 3 мамырда Дирекция Еңбек ұтқырлығы орталығы ұйымдастырған бос орындар жәрмеңкесіне қатысты. Іс-шара барысында 180-ге жуық азаматты қабылдау және кеңес беру жүзеге асырылған. Осылайша, 93 азамат бос жұмыс орындарына қызығушылық танытып, түйіндеме өткізген (40 – электронды түрде, 53-қағаз түрінде). Біліктілік талаптарына сәйкестігі және әңгімелесу нәтижесі бойынша Дирекцияға 25 адам жұмысқа қабылданғанын атап өткен жөн.
Түйіндеме өткізген азаматтардың «маған хабарласпай жатыр, талапқа сәйкес келмедім-ау» деп алаңдайтын жөні жоқ. Қалған түйіндемелер қызметкерлердің басқа жұмысқа ауысуы немесе жұмыстан шығуы кезінде кезекпен қарастырылмақ. Сондай-ақ, «Еңбек.кз» сияқты жұмыс орындары жарияланатын сайттардағы мәліметтер назарға алынбақ.