Чехияда инфляция деңгейі соңғы 10 жылдағы ең төменгі көрсеткішке жетті

АСТАНА. KAZINFORM — Қаңтар айында тұтыну бағаларының өсу қарқыны айтарлықтай баяулады: жылдық инфляция 1,6 пайызға дейін төмендеді. Бұл соңғы он жылдан астам уақыт ішіндегі ең төменгі деңгей болып отыр, деп хабарлайды АЗЕРТАДЖ.

Агенттіктің хабарлауынша, желтоқсан айымен салыстырғанда көрсеткіш 0,5 пайыздық тармаққа азайған.

Бұған жаңартылатын энергия көздерін қолдауға кететін шығындарды үй шаруашылықтарынан мемлекеттік бюджетке көшіру туралы шешім негізгі себеп болған.

Айлық есепте, керісінше, бағалар 0,9 пайызға өсті. Бұл негізінен азық-түлік, сусындар және темекі өнімдерінің қымбаттауымен байланысты.

Сонымен қатар, елде электр энергиясы мен жанармай бағасы айтарлықтай арзандаған.

Сондай-ақ, қызмет көрсету саласында баға өсімі жалғасып жатыр: тұрғын үйді жалға алу, қонақүй қызметтері, туризм және коммуналдық қызметтер қымбаттаған.

Сарапшылардың пікірінше, дәл осы қызмет көрсету саласы инфляциялық қысымның негізгі көзі болып қалып отыр.

Осыған дейін былтыр қазан айында Чехияда тұтыну бағалары жылдық есепте 2,5 пайызға өскені анықталды. Чехиялық статистика басқармасының деректері бойынша, былтыр қыркүйекте инфляция 2,3 пайызды құраған.