Чемпиондар лигасы: «Милан» жарыс жолынан шығып қалды

АСТАНА. KAZINFORM — Бүгін УЕФА Чемпиондар лигасы плей-офф сатысындағы қарымта ойындар өткізілді.

Жарыстың аталған сатысында Италияның «Милан» командасы Нидерландтың «Фейеноорд» клубына жол берді. Алғашқы кездесуде олар қарсыласына 0:1 есебімен жол берген еді. Бұл жолы италиялық клуб сапынан Сантьяго Хименес небәрі 40 секундта есеп ашқан болатын. Дегенмен нидерландық клубтан Хулиан Карранса 73-минутта таразы басын теңестіріп кетті. Осылайша кездесу 1:1 есебімен тең аяқталып, ширек финалға «Фейеноорд» өтті.

Сондай-ақ дәл осындай есеп «Бавария» (Германия) мен «Селтик» (Шотландия) кездесуінде тіркелді. Бірінші ойында германиялық ұжым аталған қарсыласын 2:1 есебімен тізе бүктірген еді.
Ал «Бенфика» (Португалия) мен «Монако» (Франция) 3:3 есебімен тең түсті. Алғашқы кездесуде португалиялық клуб 1:0 есебімен жеңгеннен кейін ширек финалға шықты.

«Аталанта» (Италия) өз алаңында «Брюгге» (Бельгия) клубына 1:3 есебімен жол беріп, жарыс жолынан шығып қалды. Бірінші кездесуде бельгиялық клуб 2:1 есебімен басым түсті.

Сондай-ақ жарыстың аталған сатысында 19 ақпанда «Пари Сен-Жермен» (Франция) мен «Брест» (Франция), ПСВ (Нидерланд) мен «Ювентус» (Италия), «Реал Мадрид» (Испания) пен «Манчестер Сити» (Англия), «Боруссия Дортмунд» (Германия) пен «Спортинг Лиссабон» (Португалия) ойнайды.