АСТАНА. ҚазАқпарат - Елордалық «Астана» командасының UEFA Чемпиондар лигасы бірінші іріктеу сатысындағы қарсыласы белгілі болды, деп хабарлайды ҚазАқпарат тілшісі.
Қазақстандық клуб жарыстың алғашқы сатысында Грузияның «Динамо» (Тбилиси) командасымен кездеседі.
Бірінші ойын өз алаңында 11/12 шілдеде өткізілсе, қарымта кездесу сырт алаңда 18/19 шілдеге белгіленген.
«Динамо» - Грузияның белгілі клубтарының бірі. Өз елінде 19 мәрте чемпион атанды.
1981 жылы UEFA кубок иелерінің кубогында бас бәйгеге қол жеткізді.
Айта кетсек, «Астана» 2015/16 жылғы кезеңде аталған турнирдің топтық кезеңінде ойын көрсетті.
Ал 2016, 2017, 2018 жылдарда Еуропа лигасы топтық кезеңінде сынға түсті.
2014/2015 жылғы кезеңде «Динамо» Чемпиондар лигасы екінші іріктеу сатысында қазақстандық «Ақтөбе» командасына 0:1, 0:3 есебімен жол берген.
Еске салсақ, бұдан бұрын «Тобыл» командасының Конференция лигасындағы ықтимал қарсыластары анықталған еді.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.