НҰР-СҰЛТАН. ҚазАқпарат – Еуропа футбол қауымдастығы одағы (УЕФА) 2021-2022 жылғы маусымдағы Чемпиондар лигасының финалдық матчын Санкт-Петербургтен Парижге ауыстыру жөнінде шешім қабылдады, деп хабарлайды ҚазАқпарат тілшісі.
УЕФА мәлім еткендей, бас еурокубоктың шешуші ойыны 28 мамыр, сенбі күні «Стад де Франс» стадионында өтеді.
УЕФА-ның атқарушы комитеті кезектен тыс отырысында Еуропадағы жағдайдың күрделенуіне байланысты осындай шешімге келген.
Футбол қауымдастығы түсіністік пен қолдау танытқаны үшін Франция президенті Эммануэль Макронға алғысын білдірді.
Сонымен қатар УЕФА аясында Ресей мен Украина аумағында өтуі тиіс барлық клубтар мен құрамалардың ойындары бейтарап алаңға ауыстырылатын болады.
Еске сала кетейік, бұдан бұрын Чемпиондар лигасында «Манчестер Юнайтедтің» алғашқы кездесуінде тең түскенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).