«Қуаты жылына 1 250 мың тонна полиэтилен өндіру жобасы бойынша бүгінгі таңда стратегиялық серіктесті іздестіру жұмысы жүргізілуде. Ол үшін лицензиялық технологияның болуы, өткізу нарықтарына кепілдік беру және қаржыландыруды ұйымдастыру мүмкіндігі сынды негізгі өлшемшарттар анықталды. Солардың негізінде мұнай-газ химия компанияларының топтары қалыптастырылды», - деді Нұрлан Ноғаев.
Министрдің айтуынша, қазіргі уақытта Chevron Phillips Chemical компаниясымен келіссөздер басталды. Аталған компания өзінің «MarTECH» лицензиялық технологиясын және off-take келісімшартын сүйемелдеуге қатысты көмегін ұсынып отыр.
«Ынтымақтастық, оның ішінде жобаға қатысу туралы егжей-тегжейлі мәселелер жақын арада талқыланатын болады. Стратегиялық серіктесті тартудың негізгі шарты – жобаны шикізатпен қамтамасыз ету болып табылатындықтан, бүгінгі таңда Теңізшевройлмен бірлесіп, қуаты 9,7 млрд текше метр газ айырғыш қондырғыны – құрғақ газдан этан алуға арналған қажетті инфрақұрылымды салу мәселесі пысықталуда», - деді ол.
Оның атап өтуінше, жапондық Japan Gasoline Co. Holdings Corporation компаниясы жобалық-сметалық құжаттаманы әзірлеу бойынша жұмыстар жүргізуде. Оны аяқтау осы жылдың соңына жоспарланған.