COP29 қорытындысы: Қазақстан жаңа Ұлттық деңгейде айқындалатын үлесті әзірлеуі керек
АСТАНА. KAZINFORM – Қазақстан COP-тың келесі жиынына дейін жаңа Ұлттық деңгейде айқындалатын үлесті әзірлеуі керек. Бұл туралы ҚР Экология және табиғи ресурстар министрлігі Климаттық саясат департаменті Климаттың өзгеруіне бейімделу басқармасының жетекшісі Шаттық Тастемірова айтты.
«БҰҰ негізгі климаттық саммиті - COP29-да Мемлекет басшысы Қасым-Жомарт Тоқаев Қазақстан жаһандық климаттық мәселелерді шешуді қолдайтынын және 2060 жылға қарай көміртегі бейтараптылығына қол жеткізуді мақсат етіп отырғанын айтты. Бұл біздің еліміз үшін өте жоғары межелі мақсат. Біз жауапты орган ретінде жаһандық климаттық келіссөздерге қатысып отырамыз. Осындай маңызды келіссөздердің бірі «климаттық қаржыландыру бойынша жаңа коллективті мақсатты анықтау» болды. Париж келісімі елдері 2035 жылға қарай дамушы елдерге климаттық міндеттемелерін орындауы үшін жылына 300 млрд АҚШ долларын бөлу туралы келісімге келді.
Қазіргі кезде біздің министрлік алдында жаңа Ұлттық деңгейде айқындалатын үлесті (ҰАҮ) әзірлеу міндеті тұр. Өздеріңіз білетіндей, Париж келісімі елдері өздерінің ұлттық деңгейде айқындалатын үлесін жаңартып тұруы керек. Біздің бұған дейінгі ҰАҮ-мізде 2030 жылға қарай парниктік газдар шығарындыларын 1990 жылғы көрсеткіштен 15 пайыз төмендету міндеті жазылған. Енді келесі өтетін COP саммитіне дейін біз жаңа кезеңді қамтитын ҰАҮ ұсынуымыз және оны келесі жылдың алғашқы жартысында таныстыруымыз керек», - деді ол COP29 саммитінің қорытындысына арналған баспасөз мәслихатында.
Ведомство өкілінің айтуынша, биыл Париж келісімі елдері жыл соңына дейін ашықтық бойынша өзінің алғашқы екіжылдық есебін тапсыруы тиіс болған. Қазақстан алғашқы 9 елдің қатарында БҰҰ Негіздемелік конвенциясы хатшылығына өз есебін тапсырды. Бұл еліміздің Париж келісімі аясындағы жұмыстарды жақсы атқарып жатқанын, жұмыстың ашықтық деңгейі жоғары екенін көрсетеді.
Бұған дейін COP29 төрағалығы барлық тараптарды 2035 жылға қарай климаттың өзгеруімен күресу үшін дамушы елдерді қаржыландыру көлемін 1,3 триллион долларға дейін ұлғайтуға шақырады.