«Даму» қоры еліміздің барлық өңірлерінде кәсіпкерлікті дамытатын орталықтар ашуды жоспарлап отыр

АСТАНА. Мамырдың 6-сы. ҚазАқпарат /Ернұр Ақанбай/ - «Даму» қоры таяу уақытта еліміздің барлық өңірлерінде кәсіпкерлікті дамытатын орталықтар ашуды жоспарлап отыр. Бұл туралы бүгін Астанада өткен BNews.kz порталындағы интернет конференцияда Премьер-министрдің орынбасары Серік Ахметов айтты,

деп хабарлайды ҚазАқпарат. Оның айтуынша, «Даму» қорының мұндай орталықтары жаңа бизнесмендерге тегін консультациялық және сараптамалық көмек көрсететін болады. «Мағлұмат үшін айта кетейін, «Даму» кәсіпкерлікті дамыту қоры қазіргі уақытта микронесиелік ұйымдарды несиелеумен шұғылданады. Олар өз кезегінде кәсіпкерлерге, оның ішінде бизнесін жаңа ашқандарға 10 млн. теңгеге дейін несие береді», деді Вице-премьер. Сонымен қатар, С. Ахметов екінші деңгейлі банктер шағын және орта бизнесті қайта қаржыландыру және несиелеу бағдарламасы бойынша қаржыландырудан бас тартса, кәсіпкер Қазақстан қаржыгерлер қауымдастығына, «Даму» қорына, «Атамекен» ұлттық- экономикалық палатасына және Кәсіпкерлікті дамыту форумына шағымдана алатынын атап өтті.