Дархан Сатыбалды Түркістан облысы әкімі лауазымында несімен есте қалды
ТҮРКІСТАН. KAZINFORM — Жаңадан құрылған Түркістан облысының үшінші әкімі ретінде Дархан Амангелдіұлы аймақта не істей алды, несімен есте қалды?
Дархан Сатыбалды 1974 жылы Оңтүстік Қазақстан облысында туған. С. Сейфуллин атындағы Ақмола ауылшаруашылығы институтын, Қазақ гуманитарлық заң университетін бітірген. Экономика ғылымдарының кандидаты.
Мансап жолында Қаржы министрлігінде, Президенттің Іс басқармасында, Білім және ғылым министрлігі мен Ұлттық қауіпсіздік комитетінде әртүрлі лауазымдарда қызмет атқарды.
Шымкент қаласының әкімі, Оңтүстік Қазақстан облысы әкімінің бірінші орынбасары лауазымдарында еңбек етіп, Парламент Сенатының депутаты болып сайланды. Қазақстан Республикасының Өзбекстан Республикасындағы Төтенше және Өкілетті Елшісі болды.
2022 жылдың 31 тамызында Түркістан облысының әкімі лауазымына тағайындалған Дархан Сатыбалды әкім ретінде 2,5 жыл жұмыс істеді.
Дархан Амангелдіұлының іскерлігіне жергілікті тұрғындар жоғары баға береді. Әсіресе, халықпен тілдесіп, мәселе шешудегі іскерлігін тамсана айтып отырады. Тіпті, дипломатиялық қабілетімен, кәсіпкерлікті қолдаудағы іскерлігіне «Тәшкен көрген әкім» деп баға беретіндер де бар.
Жалпы Дархан Амангелдіұлы қазақ, орыс, өзбек тілдерін еркін меңгерген. Күліп жүріп-ақ көп іс тындыратындығымен танымал.
Енді солардың бірнешеуіне қысқаша тоқталып өтейік…
Мемлекет басшысы Қасым-Жомарт Кемелұлының тікелей бастамасымен дайындалған «Түркістан қаласының Ерекше мәртебесі» туралы Заң жобасы Парламент Мәжілісінде мақұлданды. Бұл заң халқымыздың тарихи Түркістанға деген құрмет сезімін тереңдете түсетіні анық.
Кентау қаласы экологиялық апат аймағы деп танылды және тұрғындар жалақысына 20% үстемеақы қосылатын болды.
Түркістанда ботаникалық бағы бар «Жастар» саябағы ашылды. Саябақ ішіндегі жабық жылыжайда әртүрлі құрлықтан жеткізілген өсімдіктердің 70-ке жуық түрі өсіріледі.
Олардың ішінде Жерорта теңізі, Латын Америкасы, Еуропа, Оңтүстік Шығыс Азия және тағы басқа аймақтардың өсімдіктері бар.
Түркістан облысында заманауи мал биржасы, бордақылау кешені, ет өнімдерін терең және қайта өңдеу бағытында 5 жаңа жоба жүзеге асатын болды. Бұл бағытта 55 млрд теңге инвестиция салынып, 600 жұмыс орны құрылды және 35 мың тонна өнім шығарылатын болады.
Бұрын шетелден әкелінетін су үнемдеу технологиялары Түркістанда шығарыла бастады. Өндірістік паркте ашылған компаниялардың су үнемдеу технологиялары басқа да облыстарға сатылып жатыр.
Түркістан облысы — республикада мақта өсіретін жалғыз аймақ. Биыл 106 мың гектарға мақта егілді. Дегенмен, дәстүрлі әдісті қолданғандықтан, оның өнімділігі де төмен болып отыр. Сол себептен Түркістанда мақтаның элиталық сорты өсіріліп, мата зауыты ашуға басымдық берілді.
Облысқа инвестиция тарту және тәжірибе алмасу мақсатында Қытай, Ресей, Аустралия, Өзбекстан, Қатар және Оңтүстік Корея елдеріне түркістандық кәсіпкерлердің сапары ұйымдастырылып, алпауыт компаниялармен маңызды келіссөздер жүргізілді. Нәтижесінде, шетел капиталының қатысуымен 910 млн АҚШ долларын құрайтын 6 инвестициялық жоба басталды.
Түркістан облысында өнеркәсіп иелері үшін электр қуаты арзандатылды. Сондай-ақ, өңірде 4 мың тонна көкөніс сақтайтын заманауи қойманың құрылысы басталды.
Дархан Сатыбалды 2,5 жылда Түркістан облысының аудан-қалаларын бірнеше реттен аралап, халықпен тұрақты кездесулер өткізді. Мыңнан аса тұрғынды жеке қабылдап, өтініштерін тыңдады. Нәтижесінде жылдар бойы қордаланған мәселелер шешімін тапты.
Облыста құрылыс жұмыстары тынымсыз жүріп жатыр. 2 жылда қарқыны артып, 2 миллион шаршы метр тұрғын үй пайдалануға берілді. Нәтижесінде баспаналы болған 6 327 отбасы қоныс тойын тойлады.
Мектеп оқушыларын тасымалдауға арналған 100-ден аса автобустар сатып алынып, шалғай ауылдарға таратылды.
Ақпараттық технологиялар саласының кадрларын даярлау мақсатында биыл Түркістан қаласында IT университетін ашу бойынша Оңтүстік Кореяның «Вусонг» университетінің филиалын ашу бойынша келісімге қол қойылды. Оған сәйкес университет ретінде Түркістан облысының әкімшілік-іскерлік орталығы аумағынан 18 қабатты ғимараттың құрылыс жұмыстары жүргізілуде.
90 жыл бұрын салынған (1934 жылы) Кентау жылу орталығы бұрын-соңды болмаған ауқымды жаңартудан өтті. Орталықты жанғырту бағытында ауқымды жұмыстар жүргізуге 13 млрд. теңге қаралды. 6 қазандыққа қайта құру жұмыстары жүргізілді. Бұдан бөлек, 2 қазандық ағымдағы жөндеуден өтті. 6,6 шақырым магистралды жылу құбыры жаңартылып, 1 турбина және құрал-жабдықтар ағымдағы жөндеуден өткізілді.
Өңірде «Мұз сарайы», Б.Саттарханов спорт кешені ашылды. Сонымен қатар, Түркістан қаласында ескек есу каналы және атшабар көпфункцияналды спорт кешендерінің құрылысы жүргізілуде.
2023-2024 жылдарда 50 елді мекен орталықтандырылған ауыз сумен қамтылды, 22 елді мекенде тозығы жеткен су жүйелері жаңартылды.
Облыста табиғи газбен 510 елді мекен қамтылып, жалпы қамту деңгейі 63,2%-ға жетті.
Бүгін Мемлекет басшысының Жарлығымен Дархан Амангелдіұлы Сатыбалды Қазақстан Республикасы Президентінің Әкімшілігі Басшысының бірінші орынбасары болып тағайындалды.
Ал, Мемлекет басшысының Жарлығымен Нұралхан Оралбайұлы Көшеров Түркістан облысының әкімі лауазымына тағайындалды.