АСТАНА. KAZINFORM – Қазақстанның екінші, әлемнің 184-ракеткасы Денис Евсеев Оттиньи-Лувен-ла-Нёв (Бельгия) челленджер турниріне жолдама алды.
Қазақстандық теннисші іріктеу сайыстарының финалында дүниежүзілік рейтингіде 277-орында тұрған түркиялық Джем Илькельмен шеберлік байқасты.
Бір сағаттан астам уақытқа созылған бәсекеде Д.Евсеев 6:3, 6:1 есебімен жеңіске жетті. Ол 4 эйспен бірге 8 брейк-пойнттың бесеуін өз есебіне жазды. Д.Илькель 2 эйс, 1 брейкпен шектелді.
Осылайша, негізгі жарысқа жолдама алған Денис Евсеевтің келесі қарсыласы кейін анықталады.
Тағы бір қазақстандық, әлемнің 262-ракеткасы Михаил Кукушкин іріктеу сайыстарының финалында екі сағаттан астам уақытқа созылған тартысты кездесуде рейтингіде 273-сатыдағы Польша өкілі Макс Касниковскиге жол берді – 6:2, 5:7, 3:6. Сөйтіп Кукушкин негізгі кезеңге өте алмады.
Еске сала кетейік, бұдан бұрын Аустралия чемпионатында Асылжан Арыстанбекованың жасөспірімдер арасында ширек финалға шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).