АСТАНА. KAZINFORM – Қазақстандық, әлемнің 218-ракеткасы Денис Евсеев Хельсинки (Финляндия) челленджер турнирінің жартылай финалына өтті.
Қазақстандық теннисші ширек финалда әлемнің – 96, осы жарыстың 3-ракеткасы, корт иесі Отто Виртаненмен шеберлік байқасты.
Д.Евсеев сенсация жасап, азулы қарсыласын 6:4, 7:5 есебімен тізе бүктірді. Бір сағат 22 минутқа созылған матчта ол 6 эйспен бірге 5 брейк-пойнттың үшеуін өз есебіне жазды. Виртанен 3 эйс, 1 брейктен (7 брейк-пойнт) аса алмады.
Денис Евсеев финалға шығу үшін әлемнің 102-ракеткасы, италиялық Люка Нардимен таласады. Ол ширек финалда рейтингіде 185-орындағы ұлыбританиялық Ян Чоинскийден басым түсті – 6:4, 6:3.
Қазақстандық теннисші қазіргі сәтте ATP Live рейтингісінде 204-сатыға көтеріліп тұр.
Еске сала кетейік, бұдан бұрын Денис Евсеевтің Хельсинки турнирінің ширек финалына шыққанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).