АСТАНА. KAZINFORM – Қазақстанның – екінші, әлемнің 184-ракеткасы Денис Евсеев Тенерифе (Испания) челленджер турнирінің жартылай финалына шықты.
Қазақстандық теннисші ширек финалда рейтингіде 337-сатыда тұрған италиялық Самюель Винсент Руджеримен шеберлік байқасты.
Бірінші партияда Денис 6:3 есебімен басым болды. Екінші сетте де сол қарқынынан танған жоқ – 6:4.
Бір сағат 24 минутқа созылған бәсеке барысында Евсеев 8 брейк-пойнттың тең жартысын мүлт жіберген жоқ. Руджери 5 эйс, 1 брейкпен көзге түсті.
Денис Евсеев финалға шығу үшін әлемнің 127-ракеткасы, америкалық Брендон Накасимамен таласады.
Тағы бір қазақстандық Михаил Кукушкин ширек финалда испаниялық Хавьер Косано Барранкодан ойсырай ұтылды – 1:6, 1:6.
Еске сала кетейік, бұдан бұрын Денис Евсеевтің Испанияда жарыстың бірінші ракеткасын ұтқанын жазған болатынбыз.
Сондай-ақ қазақстандық теннисші Аргентинадағы жарыстың жартылай финалына жолдама алды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).