АСТАНА. KAZINFORM – Қазақстандық теннисші, әлемнің 177-ракеткасы Денис Евсеев Оэйраш (Португалия) челленджер турнирінің жартылай финалына жолдама алды.
Евсеев ширек финалда отандасы, әлемнің 174-ракеткасы Бейбіт Жұқаевпен жолы түйісті. Бірінші партияда Денис 6:4 есебімен басым түссе, екіншісінде Бейбіт есе қайырды – 6:2.
Шешуші, үшінші сетте Евсеев сәтті ойнады – 6:3. Екі сағатқа созылған матчта Жұқаев 7 эйспен бірге 9 брейк-пойнттың бесеуін пайдаланды. Евсеев 3 эйс, 5 брейкпен (11 брейк-пойнт) көзге түсті.
Денис Евсеев финалға шығу үшін әлемнің 200-ракеткасы, швециялық Элиас Имермен таласады.
Қазіргі кезде ATP Live рейтингісінде Д.Евсеев 165, Б.Жұқаев 169-орынға көтеріліп тұр.
Еске сала кетейік, бұдан бұрын Астанада алғаш рет Азия теннис федерациясы директорлар кеңесінің мүшелері бас қосқанын жазған болатынбыз. Сондай-ақ Анна Данилина Италиядағы жарыстың финалына жолдама алды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).