Қазақстандық, әлемнің 197-ракеткасы Денис Евсеев Майя (Португалия) челленджер турнирін жеңіспен бастады, деп хабарлайды Kazinform.
Қазақстандық теннисші бастапқы кездесуін әлемдік рейтингте 403-орында тұрған грекиялық Стефанос Сакелларидиспен сәтті өткізді.
Бір сағат 37 минутқа созылған матчта Денис Евсеев 6:2, 7:6 (7:5) есебімен жеңіске жетті.
Ол 1 эйс жасап, 11 брейк-пойнттың үшеуін пайдаланды. Грекиялық спортшы 2 эйс, 1 брейкпен (5 брейк-пойнт) шектелді.
Қазақстандық теннисші ширек финалға шығу үшін әлемнің 159-ракеткасы, швециялық Элиас Имермен таласады.
Денис Евсеев өткен аптада Валенсия (Испания) жарысының жартылай финалына дейін жетуінің нәтижесінде рейтингте 226-дан 197-ге көтерілген еді.
Еске сала кетейік, бұдан бұрын Елена Рыбакинаның жаңа маусымды қай жарыстан бастайтыны белгілі болғанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).