АСТАНА. KAZINFORM – Қазақстандық теннисші, әлемнің 177-ракеткасы Денис Евсеев Оэйраш (Португалия) челленджер турнирінің финалына шыға алмады.
Отандасымыз жартылай финалда дүниежүзілік рейтингіде 200-орында тұрған швециялық Элиас Имермен шеберлік байқасты.
Бір сағат 18 минутқа созылған кездесуде Э.Имер 7:5, 6:3 есебімен жеңіске жетіп, финалға өтті.
Тағы бір қазақстандық теннисші әлемнің 60-ракеткасы Александр Шевченко Бордо (Франция) челленджер жарысының ширек финалына шыға алмады. Доданың 3-ракеткасы болып тіркелген ол екінші айналымға бірден өткенімен, рейтингіде 123-сатыдағы франциялық Джованни Мпеши-Перрикардан тартысты матчта жеңіліс тапты – 6:7 (2:7), 6:3, 3:6. Бұл бәсеке 1 сағат 54 минутқа созылды.
Еске сала кетейік, бұдан бұрын Денис Евсеевтің Португалияда Бейбіт Жұқаевты жеңіп, жартылай финалға өткенін жазған болатынбыз. Сондай-ақ Александр Недовесов Италиядағы турнирдің ширек финалына шықты.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).