Денсаулық сақтау вице-министрі Ақтаудағы тамақтан уланған оқушылардың жағдайымен танысты
АҚТАУ. KAZINFORM – Маңғыстау облысына ҚР Денсаулық сақтау вице-министрі Ержан Нұрлыбаев және Астана медициналық университетінің дәрігерлері келді. Олар облыстық балалар жұқпалы аурулар ауруханасына барып, тамақтан уланған оқушылардың жағдайымен танысып, қабылдау бөліміндегі мамандарының жұмысын көрді.
Фото: Маңғыстау облыстық қоғамдық коммуникация орталығынан
Вице-министрі Ержан Шәкірұлы балалардың денсаулығы жақсарып, тез қалпына келуі үшін сапалы медициналық көмек көрсетуді тапсырып, жағдайдың бақылауда екенін жеткізді.
Фото: Маңғыстау облыстық қоғамдық коммуникация орталығынан
Маңғыстау облыстық балалар көпбейінді ауруханасының директоры Гүлжан Ермекбаеваның айтуынша, жағдай тұрақталып келеді.
– Дәрі-дәрмек қоры мен төсек-орын жеткілікті. Медициналық қызметкерлер эпидемиологиялық жағдайға байланысты түнгі кезекшілікпен жұмыс істеуде. Қабылдау бөліміне келіп жатқан балалардың саны да азайып келеді. Бүгін 15 шақты бала үйлеріне шығарылуы мүмкін, - дейді Гүлжан Ермекбаева.
Еске салайық, Маңғыстауда Мұнайлы ауданында бір мектептің 500-ге жуық оқушысы астан уланып қалды. Олардың барлығы да мектеп асханасында тегін ыстық тамақ ішкеннен кейін ауырған. Осы оқиғадан кейін бүкіл ел бойынша мектептердің асханасы тексерілетін болды.
Ізбасарова Аягөз Оралбайқызы телевизия саласында 2003 жылдан бері жұмыс істейді. Еңбек жолын «Қазақстан» РТРК» АҚ Маңғыстау облыстық филиалы «Қазақстан-Ақтау» телеарнасында жүргізуші-редакторлықтан бастап, редактор, шеф-редактор қызметтерін атқарды. Соңғы 7 жылдан бері «Қазақстан» Ұлттық арнасының Маңғыстаудағы меншікті тілшісі. Ақпарат саласының үздігі. Kazinform халықаралық ақпарат агенттігінде 2024 жылғы мамырдан бастап қызмет етеді.