Димаш Құдайбергеннің Польшадағы жанкүйерлері әншінің туған күніне орай ағаш отырғызды
АСТАНА. KAZINFORM — Варшавадағы Польша Ғылым академиясының Ботаникалық бағында ерекше іс-шара болды. Әлемге әйгілі қазақстандық әнші Димаш Құдайбергеннің поляк жанкүйерлері оның құрметіне мемориалдық алмұрт ағашын отырғызу рәсімін ұйымдастырды. Бұл туралы dimashnews.com жазды.
Димаштың туған күніне арналған бұл символикалық сыйлық варшавалық жанкүйерлердің бастамасы және әншінің жұмысына деген сүйіспеншілік пен қоршаған ортаға деген қамқорлықты біріктірді.
Ағаштың жанына мәтіні қашалған тақта орнатылды.
Онда былай деп жазылған: «ДИМАШ ҚҰДАЙБЕРГЕН. Әлемге әйгілі қазақ әншісі, композитор және мультиаспапшы. Баритон регистрінің төменгі ноталарынан ең жоғары сопраноға дейін 6 октавадан тұратын ерекше вокалдық диапазоны бар.
Сонымен қатар тақтада Димаштың суреті мен оның YouTube-тегі ресми аккаунтына апаратын QR коды бар.
Іс-шарада пикник болып, от жағылды. Қонақтар үй тағамдарымен, әншінің шығармашылығымен байланысты жылы естеліктерімен және эмоцияларымен бөлісті. Концерттің атмосферасы көтеріңкі көңіл күй мен шабытқа толы болды.
Фан-клуб әкімшілігінің айтуынша, бұл концерт поляк жанкүйерлерінің Димашқа жолдаған шынайы алғысы мен қолдауына толы іс-шаралардың бірі болды.
Айта кетейік, бүгін, 24 мамыр — әлемдік деңгейдегі танымал әнші, композитор, мультиинструменталист Димаш (Дінмұхаммед) Құдайбергеннің туған күні. Әнші 31 жасқа толып отыр.
15 мамырда Димаш Құдайберген белгілі қазақ ақыны әрі жазушысы, қазақ әдебиетінің негізін салушылардың бірі Сәкен Сейфуллиннің әніне түсірілген жаңа бейнебаянның тұсауын кесті.