Дин Юн: CGTN Орталық Азиядағы БАҚ-пен ынтымақтастыққа айрықша мән береді
АСТАНА. KAZINFORM — Қытайлық CGTN телеарнасы Орталық Азия елдерінің бұқаралық ақпарат құралдарымен байланысты тереңдетуге ниетті.
Бұл туралы телеарна бас редакторының орынбасары Дин Юн Астанада өтіп жатқан «Жаһандық өзгерістер дәуіріндегі Орталық Азия. Стратегиялық даму құралы ретіндегі медиа» атты ІІ Орталық Азия медиафорумында айтты.
Дин Юнның айтуынша, БАҚ халықтар арасындағы өзара түсіністікті және достықты тереңдетуде маңызды рөл атқарады.
— Қытай әрқашан Орталық Азия елдері сенім артқан тату көрші, жақсы серіктес және жақсы бауырлас болды. CGTN өзінің мол жаңалықтары және ақпараттарымен әлемдік БАҚ үшін маңызды ақпарат көзі болуға ұмтылады. Сонымен бірге, біз барлық елдің білімді адамдары үшін ашық диалог пен идеялар алмасу алаңын қамтамасыз етуге дайынбыз, — деді ол.
Сонымен қатар, Дин Юн қазіргі уақытта Орталық Азия елдерінде табысты ынтымақтастық құрғанын еске салды.
— CGTN әрқашан Орталық Азиядағы БАҚ-пен ынтымақтастыққа айрықша мән береді. 2023 жылы Қытай-Орталық Азия бірінші саммиті қарсаңында CGTN Орталық Азияның бес елінің БАҚ өкілдерімен бірге Қытай мен Орталық Азияның жоғары деңгейлі медиа диалогті онлайн режимде сәтті өткізді. Бұл шара Қытай-Орталық Азия саммитінің негізгі іс-шараларының бірі болды. Өткен жылы біз ШЫҰ Астана саммитінде Орталық Азия елдеріндегі әріптестерімізбен табысты жұмыстар атқардық, — деді Дин Юн.
CGTN телеарнасы бас редакторының орынбасары Орталық Азиядағы БАҚ-пен ынтымақтастықты одан әрі тереңдету және объективті әрі әділ халықаралық қоғамдық пікір ландшафтын құру үшін өз ұсынысын айтты.
— Біріншіден, біз медиа ынтымақтастығы үшін жаңа әдістерді, арналарды және мазмұнды жаңартып, Қытай мен Орталық Азия ынтымақтастығы үшін үлес қосуымыз керек. Соңғы жылдары Қытай-Орта Азия қарым-қатынастары мен аймақтық даму қарқынды өміршеңдігін көрсетті. Біз Қытай мен Орталық Азия арасындағы достық қарым-қатынас тарихын және «Бір белдеу, бір жол» бастамасы аясындағы ынтымақтастық тарихын бірлесіп баяндау үшін Қазақстанда өтетін «Қытай-Орталық Азия» саммитінің мүмкіндігін пайдалана отырып, Орталық Азиядағы БАҚ-пен бірлесіп жұмыс істеуге дайынбыз, — деді ол.
Халықаралық қоғамдық пікір кеңістігінде әртүрлі үйлесімділік және айырмашылықтарды сақтай отырып, ортақ негіз іздеудің коммуникациялық құндылық тұжырымдамасын белсенді түрде қолдау — екінші ұсыныс.
— Үшіншіден, біз жаңалықтар мен шындықтың қорғаушысы болуымыз керек. Салауатты, әртүрлі және жақсы ұйымдастырылған мазмұн экожүйесін құру үшін барлық медиа серіктестермен жұмыс істейміз деп үміттенеміз. IA дәуірінің сынақтары мен мүмкіндіктерін бірге еңсеру үшін ортақ мақсатта жұмыс істейік. Біз IA технологиясының мазмұнды инновацияға бағытталуын, ақпараттың шынайылығы мен тиімділігін қамтамасыз етуіміз керек. Қытайда «Ұлы ізгілік үстемдік құрса, дүние бәріне ортақ болады» деген мақал бар. Біз барлық елдің медиа әріптестерімен инклюзивтілік пен түсіністікті қолдау, өзара тиімді ынтымақтастықты ілгерілету үшін жұмыс істейміз деп үміттенеміз, — деді Дин Юн.
Осыған дейін Мәдениет және ақпарат министрі Аида Балаева қазақстандық сериалдар мен фильмдер ТМД, Еуропа және Азия елдеріне экспортталып жатқанын айтты.