АСТАНА. KAZINFORM – Қазақстандық, әлемнің 338-ракеткасы Дмитрий Попко АҚШ-тағы Палм-Коуст ITF турнирінің чемпионы болды.
Жарыстың 2-ракеткасы болып тіркелген қазақстандық теннисші финалда дүниежүзілік рейтингіде 649-орында тұрған эквадорлық Андрес Андрадемен чемпиондық атақты сарапқа салды.
Бірінші партияда А.Андраде 4:2 есебімен алға кетті. Дегенмен Д.Попко таразы басын теңестіріп қана қоймай, басымдылық танытты – 7:5.
Екінші сетте Андраде бет қаратпады – 6:1.
Үшінші, шешуші партияда есеп 5:5 болған мезетте қазақстандық спортшы тағы бір брейк жасай алды. Содан кейін матчқа доп бергенде, өз мүмкіндігін жіберген жоқ – 7:5.
Тартысты өткен финалдық матч 2 сағат жарымнан астам уақытқа созылды.
Осылайша, Дмитрий Попко АҚШ-тың Флорида штатында екінші рет қатарынан ITF жарысының жеңімпазы атанды.
Еске сала кетейік, бұдан бұрын Александр Бубликтің әлемдік рейтингіде рекордтық көрсеткішке қол жеткізгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).