ОРАЛ. KAZINFORM – Қазақстандық, әлемнің 358-ракеткасы Дмитрий Попко Буэнос-Айрес 2 (Аргентина) челленджер турнирін сәтті бастады.
Өткен аптада Буэнос-Айрестегі осындай жарысты Дмитрий Попко іріктеу сайыстарынан бастап, финалға дейін жеткен еді.
Бұл жолы алғашқы айналымда әлемнің 362-ракеткасы, испаниялық Карлос Санчес Ховермен бетпе-бет келді.
Бірінші партияда бір брейкті артық жасаған Попко 6:3 есебімен басым түсті.
Дмитрий екінші сетте де 4:1 есебімен алға кеткенімен, соны жалғастыра алмады. Дегенмен тай-брейкте матчты жеңіспен түйіндеді – 7:6 (9:7).
Бір сағат 35 минутқа созылған бәсеке барысында Попко 5 эйспен бірге 7 брейк-пойнттың төртеуін өз есебіне жазды. Испаниялық теннисші 1 эйс, 3 брейкпен шектелді.
Дмитрий Попко ширек финалға шығу үшін әлемнің 231-ракеткасы, словакиялық Йозеф Коваликпен сынға түседі.
Еске сала кетейік, бұдан бұрын Елена Рыбакинаның «Үлкен дулыға» турнирін жеңіспен бастағанын жазған болатынбыз.
Сондай-ақ Денис Евсеев Испаниядағы турнирде кезекті жеңісіне қол жеткізді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).