АСТАНА. KAZINFORM – Қазақстандық, әлемнің 244-ракеткасы Дмитрий Попко Загреб (Хорватия) челленджер турнирінің ширек финалына өтті.
Қазақстандық теннисші екінші айналымда дүниежүзілік рейтингіде өзінен 40 саты жоғары тұрған хорватиялық Дино Прижмичпен кездесті.
Бір сағат 40 минутқа созылған матчта Попко корт иесін жолдан тайдырды – 6:2, 6:4. Ол 4 эйспен бірге 9 брейк-пойнттың бесеуін өз есебіне тіркеді. Прижмич 2 эйс, 2 брейктен (8 брейк-пойнт) аса алмады.
Дмитрий Попко жартылай финалға шығу үшін хорватиялықтар, әлемнің 358-ракеткасы Нино Сердарушич немесе рейтингіде 359-орындағы Матей Додигтің біреуімен шеберлік таластырады.
Д.Попко қазіргі кезде ATP Live рейтингісінде 231-орынға көтеріліп тұр.
Еске сала кетейік, бұдан бұрын Анна Данилинаның Италиядағы турнирдің финалына шыққанын жазған болатынбыз.
Сондай-ақ Әмір Омарханов Ролан Гарроста сенсация жасап, жарыстың 3-ракеткасын ұтып, жартылай финалға өтті.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).