АСТАНА. KAZINFORM — Қазақстандық теннисші Дмитрий Попко Морелос (Мексика) челленджер турнирінің финалына дейін жетті.
Қазақстандық теннисші соңғы бәсекеде әлемнің 168-ракеткасы, швейцариялық Марк-Андреа Хюслермен бас жүлдені сарапқа салды.
Бірінші партияда швейцариялық спортшы 6:4 есебімен басым түссе, екіншісінде Попко есе қайтарды – 6:3.
Шешуші, үшінші сет Хюслердің пайдасына шешілді – 6:4.
Екі сағатқа жуық уақытқа созылған матч барысында Попко 7 эйске қоса 5 брейк-пойнттың екеуін пайдаланды. Хюслер 12 эйс, 3 брейкпен (5 брейк-пойнт) көзге түсті.
Бұдан бұрын Морелиядағы осындай жарыста жеңімпаз атанған Д.Попко әлемдік рейтингіде 175-тен 159-орынға көтеріледі.
Еске сала кетейік, бұдан бұрын Дмитрий Попконың екінші рет қатарынан Мексикадағы турнирдің финалына шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).