АСТАНА. KAZINFORM – Қазақстандық теннисші, әлемнің 222-ракеткасы Дмитрий Попко Яссы (Румыния) челленджер турнирінің ширек финалына шықты.
Қазақстандық теннисші екінші айналымда дүниежүзілік рейтингіде 376-сатыдағы румыниялық Сезар Крецумен жолықты.
Попко корт иесін 7:5, 6:3 есебімен қапы қалдырды. 1 сағат 35 минутқа созылған бәсеке барысында Дмитрий 4 эйспен бірге 8 брейк-пойнттың үшеуін пайдаланды. Крецу 6 эйс, 1 брейкпен көзге түсті.
Дмитрий жартылай финалға шығу үшін әлемнің 195-ракеткасы, франциялық Энцо Кокомен таласады.
Өткен аптада Брашовта дәл осындай додада финалға дейін жеткен қазақстандық теннисші қазіргі кезде ATP Live рейтингісінде 184-орынға көтеріліп тұр.
Тағы бір қазақстандық, рейтингіде 230-сатыдағы Тимофей Скатов Зальцбург (Аустрия) челленджер жарысында тартысты матчта әлемнің 86-ракеткасы, бразилиялық Тьяго Монтейродан 6:3, 3:6, 3:6 есебімен ұтылып, ширек финалға шыға алмады.
Еске сала кетейік, бұдан бұрын Уимблдонда Елена Рыбакинаның финалдан тыс қалғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).