Дональд Трамп АҚШ армиясы қатарынан 15 мың трансгендер сарбазын қуып шықпақ

АСТАНА. KAZINFORM – АҚШ-тың сайланған президентінің АҚШ қарулы күштері қатарынан барлық трансгендер әскери қызметкерлерін жұмыстан босату туралы жарлығына Дональд Трамп Ақ үйге оралған алғашқы күні қол қойылуы мүмкін, деп хабарлайды The Times басылымы. 

АҚШ-тың белсенді әскери қызметкерлерінің арасында 15 мыңға жуық трансгендер бар деп шамаланып отыр. Жұмыстан шығару олардың қызметке жарамсыздығын анықтайтын медициналық көрсеткіштер бойынша жүзеге асырылады. 

Дональд Трамп бұған дейін мәлімдегеніндей, кейбір жоғары лауазымды офицерлер әскери әрекеттерді жоспарлаудан гөрі әртүрлілік, теңдік пен инклюзияға көбірек қызығушылық танытып отыр. 

Бұл тыйым Трамптың бірінші президенттік мерзімі кезінде қабылдаған жарлығына ұқсас немесе кеңейтілген болуы мүмкін. Онда Трамп трансгендерлердің әскери қызметке қосылуына тыйым салған, бірақ қызмет етіп жүргендерге өз орындарын сақтауға рұқсат берді. Президент Джо Байден бұл бұйрықты жойды.

Пентагонның мәліметінше, құпиялылық саясаты 1,3 млн-ға жуық белсенді әскери қызметкері бар армиядағы трансгендерлер санын санауды қиындатып отыр. 

«15 мыңнан астам әскердің кенеттен кетуі, әсіресе, өткен жылы әскерилер 41 мың шақырушыны жинай алмағанын есепке алғанда, жауынгерлік бөлімшелерге әкімшілік жүктемені арттырады, бөлімшелердің біртұтастығын бұзады және маңызды дағдылардағы кемшіліктерді күшейтеді», - деді ЛГБТД+ әскери қызметкерлері мен ардагерлеріне науқан жүргізетін Американың заманауи әскери қауымдастығының атқарушы директоры Рэйчел Бранаман. 

Д.Трамп Қорғаныс министрі лауазымына ұсынған П.Хегсет армиядағы «әлсіз» және «әйелдік» басшылыққа қарсы шығып, «бас қолбасшы келесі жылы тәртіпті қалпына келтіруі керек» деп мәлімдеді.