ОРАЛ. KAZINFORM — «Ақжайық» клубы допты хоккейден жоғары лига командалары арасында бүкілресейлік жарыстың финалдық ойындарына қатысу үшін Ресейдің Кемерово қаласына аттанды.
«Ақжайықтың» бас бапкері Николай Шавалдиннің мәлім еткеніндей, оралдықтар 24 наурызда басталатын финалдық кезеңде А тобында сынға түседі.
Батысқазақстандықтар «Кузбасс» мұз сарайында бастапқыда «Маяк» (Краснотурьинск) командасымен ойнайды. «Ақжайық» екінші топта 75 ұпаймен бірінші орын алса, «Маяк» (58 ұпай) үздік үштікті түйіндеген еді.
«Ақжайық» 25 наурызда «Сибсельмаш-2» (Новосібір), одан кейін «Динамо-2» (Мәскеу) командасымен айдынға шығады. Ал 27 наурыз күні «Строитель» (Сыктывкар) клубымен қай мықтыны анықтайды.
Финалдық кезең 30 наурыз күні мәресіне жетіп, жүлделі орын алғандар анықталады. Алғашқы екі командаға супер лигаға жолдама беріледі.
Еске сала кетейік, бұдан бұрын допты хоккейден бүкілресейлік жарыстың финалдық кезеңі Кемерово қаласында өтетінін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).