ОРАЛ. KAZINFORM – Допты хоккейден жоғары лига командалары арасында бүкілресейлік жарыста өнер көрсететін Оралдың «Ақжайығы» қатарынан бесінші жеңісіне қол жеткізді.
Николай Шавалдин жаттықтыратын команданың спортшылары бұл жолы Қазанда жергілікті «Ак Барс-Динамо-2» командасымен кім мықтыны анықтады.
Бірінші таймда қазандық бенди шеберлері 3:2 есебімен алда тұрды. Есесіне екінші кезеңде оралдықтар жауапсыз төрт гол соқты. Осылайша «Ақжайық» 7:3 есебімен алаң иелерінен басым түсті.
Батысқазақстандықтардан команда капитаны Максим Өтебалиев покер жасаса, ресейлік сұрмерген Максим Пахомов 2, Қуаныш Темірәлин 1 рет нысананы дәл көздеді.
Ертең қос клуб екінші кездесуін өткізеді. Қазіргі кезде оралдықтар 27 ұпаймен екінші топта 2-орында тұр.
Еске сала кетейік, бұдан бұрын допты хоккейден «Ақжайықтың» өз тобында екінші орынға көтерілгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).