АСТАНА. KAZINFORM — Допты хоккейден жоғары лига командалары арасында бүкілресейлік жарыста Оралдың «Ақжайығы» өз айдынында «СКА-Уральский трубник-2» (Екатеринбург) командасын қабылдады.
Әп дегеннен-ақ Николай Шавалдиннің хоккейшілері ойын тізгінін өз қолдарына алып, қарсыластың қақпасына жиі қауіпті шауыл ұйымдастырумен болды.
Ресейлік сұрмерген Максим Пахомов 4 голдың авторы атанса, Нұрбол Бөкешов, тағы бір ресейлік Артем Лапшин қонақтардың қақпасына бір-бір доптан енгізді. Жалпы есеп 6:3, «Ақжайықтың» пайдасында.
Осылайша, өз тобында көш бастап келе жатқан оралдықтар ұпай санын 39-ға жеткізді. Ертең қос клуб екінші кездесуін өткізеді.
Еске сала кетейік, бұдан бұрын «Ақжайықтың» басты қарсыласын 10:4 есебімен ойсырата жеңгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).