ОРАЛ. KAZINFORM — Ресейдің Кемерово қаласында допты хоккейден жоғары лига командалары арасында бүкілресейлік жарыстың финалдық турнирінде Оралдың «Ақжайығы» соңғы кездесуін өткізді.
Батысқазақстандық команда 9-орын үшін бәсекеде «Зорький» (Красногорск) клубымен сынға түсті.
Тартысты өткен ойында алдымен «Зорькийден» Андрей Замятин есеп ашты. Дегенмен бірінші таймда Максим Пахомов 2, «Ақжайықтың» капитаны Максим Өтебалиев 1 гол соғып, есепті 3:1-ге жеткізді.
Екінші кезеңде оралдықтардан Александр Лапшин, Ершат Амангелдиев мергендік танытты. Ресейлік клубтан Семен Заваринский 1, Олег Хасянов 2 голдың авторы атанды. Қорытынды есеп — 5:4, «Ақжайықтың» пайдасында.
Осылайша, Николай Шавалдиннің шәкірттері финалдық кезеңде 9-орынға тұрақтады.
Бұған дейін «Ақжайық» көптен бері финалдық турнирге қатыспаған еді.
Еске сала кетейік, бұдан бұрын допты хоккейден «Ақжайықтың» көш басындағы командаға есе жібергенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).