Допты хоккейден жоғары лига командалары арасында бүкілресейлік жарыста Оралдың «Ақжайығы» Орынборда «Локомотивпен» екінші кездесуін өткізді, деп хабарлайды Kazinform.
Бұл ойында да Николай Шавалдин баптайтын оралдықтар қарсыласына дес бермей, ірі есеппен ұтты.
Екінші матч қатарынан «Ақжайықтың» сұрмергені, ресейлік Михаил Пахомов бес голдың авторы атанды. Сондай-ақ команда капитаны Максим Өтебалиев «Локомотивтің» қақпасында төрт допты тулатты. Тағы бір голды ресейлік Артем Лапшин енгізді.
Төрт ойыннан 12 ұпай жинаған Николай Шавалдиннің шәкірттері келесі бәсекелерін 6-7 қаңтарда Воткинскіде «Знамя-Удмуртия» командасымен өткізеді. Содан кейін өз айдынына оралады.
Еске сала кетейік, бұдан бұрын допты хоккейден «Ақжайықтың» ірі есеппен жеңгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).