ОРАЛ. KAZINFORM – Допты хоккейден жоғары лига командалары арасында бүкілресейлік жарыста Оралдың «Ақжайығы» «Жастар» стадионында Орынбордың «Локомотивімен» екінші кездесуін өткізді.
Николай Шавалдин жаттықтыратын оралдықтар кеше бірінші матчта 20:3 есебімен жеңген болатын.
Бұл жолы айдын иелері өз қақпасына доп жіберген жоқ – 17:0.
Максим Пахомов пен Рауан Исалиев бес-бестен гол соқса, команда капитаны Максим Өтебалиев хет-триктің авторы атанды. Нұрбол Бөкешов қарсылас команда қақпасына 2, Ершат Амангелдиев пен Самат Аманшин бір-бір доптан енгізді.
Осылайша, ұпай санын 45-ке жеткізген «Ақжайық» екінші топта көш бастап келеді.
Оралдықтар келесі ойындарын 3-4 ақпанда өз айдынында «Маяк» (Краснотурьинск) командасымен өткізеді. «Маяк» 40 ұпаймен үздік үштікті түйіндеп тұр.
Еске сала кетейік, бұдан бұрын «Ақжайықтың» өз тобында көш бастағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).