ОРАЛ. KAZINFORM - Допты хоккейден жоғары лига командалары арасында бүкілресейлік жарыста Оралдың «Ақжайығы» «Жастар» стадионында «Знамя-Удмуртиямен» (Воткинск) екінші ойынын өткізді.
Николай Шавалдиннің шәкірттері кеше тартысты матчта 8:6 есебімен жеңіске жеткен еді.
Бұл жолы кездесу оралдықтардың айқын басымдығымен өтті - 12:2.
Команда сұрмергені, ресейлік Максим Пахомов 8 голдың авторы атанса, Рауан Исалиев 1 доп соғып, 9 нәтижелі пас берді. Сондай-ақ команда капитаны Максим Өтебалиев екі, Болат Мұхит бір рет мергендігімен көзге түсті.
Қонақтардан Алексей Севрюков пен Михаил Гринько бір-бірден гол енгізді.
Бұл «Ақжайықтың» өз айдынындағы соңғы ойыны еді.
Батысқазақстандық клуб келесі кездесулерін Қазанда 11-12 ақпанда «Ак Барс-Динамо-2» командасымен өткізеді.
Еске сала кетейік, бұдан бұрын «Ақжайықтың» ресейлік клубтан басым түскенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).