ОРАЛ. KAZINFORM – Допты хоккейден жоғары лига командалары арасында бүкілресейлік жарыста Оралдың «Ақжайығы» кезекті матчын Краснотурьинскіде жергілікті «Маяк» командасымен өткізді.
Николай Шавалдин жаттықтыратын оралдықтар осыған дейін өз айдынындағы сегіз кездесуінің бәрінде жеңіске жетіп, өз тобында 54 ұпаймен көш бастап келе жатқан еді.
Үшінші сатыдағы «Маяк» – «Ақжайықтың» негізгі қарсыластарының бірі. Сондықтан да матч тартысты өтіп, 4:2 есебімен «Маяктың» пайдасына аяқталды.
Батысқазақстандықтардан екі допты да команданың сұрмергені, ресейлік Максим Пахомов соқты.
Айдын иелерінен Константин Еловиков, Денис Мубинов, Андрей Глазер және Антон Тихвинский мергендік танытты.
Ертең қос клуб екінші бәсекесін өткізеді.
Еске сала кетейік, бұдан бұрын «Ақжайықтың» Оралдағы соңғы кездесуінде 11:3 есебімен жеңгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).