ОРАЛ. KAZINFORM — Ресейдің Кемерово қаласында допты хоккейден жоғары лига командалары арасында өтіп жатқан бүкілресейлік жарыстың финалдық кезеңінде Оралдың «Ақжайығы» үшінші кездесуін өткізді.
Бұл жолы «Кузбасс» мұз сарайында батысқазақстандықтар «Динамо-2» (Мәскеу) командасымен ойнады.
Бастапқыда «Ақжайықтың» капитаны Максим Өтебалиев есеп ашқанымен, мәскеуліктер 4:1 есебімен алға шықты. Оралдықтар есепті барынша қысқартқанымен, жеңіс «Динамо-2» клубының еншісінде кетті — 8:6.
Ойын барысында оралдық командадан Максим Пахомов қос голдың авторы атанса, М.Өтебалиев тағы бір рет мергендігімен көзге түсті. Павел Чебаков пен Дәурен Оралов та құр кетпеді.
Николай Шавалдин шәкірттерінің А тобында бір ғана ойыны қалды. Ертең олар «Строитель» (Сыктывкар) командасымен айдынға шығады.
Еске сала кетейік, бұдан бұрын допты хоккейден финалдық турнирде «Ақжайықтың» ірі есеппен жеңіліп қалғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).