ОРАЛ. KAZINFORM — Допты хоккейден жоғары лига командалары арасында бүкілресейлік жарыста «Ақжайық» қатарынан үшінші жеңісіне қол жеткізді.
Батысқазақстандық клуб бұл жолы «Жастар» стадионында екінші топта турнир кестесінде 24 ұпаймен 2-орында келе жатқан «Академия «Уральский трубник» (Первоуральск) командасын қабылдады.
Тартысты өткен матчта Николай Шавалдиннің шәкірттері 5:3 есебімен жеңіске жетті.
«Ақжайықтың» сұрмергені, ресейлік шабуылшы Максим Пахомов хет-триктің авторы атанып, биылғы маусымдағы 7 ойыннан кейін соққан гол санын 20-ға жеткізді.
Сондай-ақ тағы бір ресейлік Артем Лапшин мен Самат Аманшин мергендік танытты.
Қонақтардан Алексей Снегирев, Андрей Зеленин, Константин Еловиков бір-бірден доп соға алды.
Ертең қос команда екінші кездесуін өткізеді.
Еске сала кетейік, бұдан бұрын допты хоккейден «Ақжайықтың» ресейлік клубты екінші рет ұтқанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).