ОРАЛ. KAZINFORM - Допты хоккейден жоғары лига командалары арасында бүкілресейлік жарыста Оралдың «Ақжайығы» кезекті матчын Краснотурьинскіде жергілікті «Маякпен» өткізді.
Ресейлік клуб 6 ойыннан кейін 18 ұпай жинап, екінші топта көш бастап келе жатқан еді.
Бірінші таймда Рауан Исалиевтің пасынан кейін «Ақжайықтың» капитаны Максим Өтебалиев есеп ашты.
«Маяктан» Михаил Красиков таразы басын теңестірді.
Екінші кезеңде Рауанның пасын Дәурен Оралов мүлт жіберген жоқ.
Максим Пахомовтың пасынан соң Болат Мұхит есепті 3:1-ге жеткізді.
Айдын иелерінен Александр Штеле есепті қысқартқанымен, М.Пахомовтың көмегімен Р.Исалиев мергендік танытты.
Бұдан кейін «Маяктан» Артем Самойлов бір гол соға алды.
Қорытынды есеп - 4:3, оралдық маман Николай Шавалдин жаттықтыратын «Ақжайықтың» пайдасында.
Ертең қос команда екінші кездесуін өткізеді.
Еске сала кетейік, бұдан бұрын допты хоккейден «Ақжайықтың» ресейлік команданы тағы да ірі есеппен жеңгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).