Допты хоккейден жоғары лига командалары арасындағы турнирде Оралдың «Ақжайығы» Орынборда жергілікті «Локомотивпен» кездесті, деп хабарлайды Kazinform.
Бұл оралдықтардың жаңа маусымдағы сырт айдындағы алғашқы матчы еді. Николай Шавалдиннің шәкірттері түзде «Локомотивті» 10:4 есебімен қапы қалдырды.
«Ақжайық» сапында ресейлік сұрмерген Максим Пахомов бес доптың авторы атанды. Команда капитаны Максим Өтебалиев те қалыса қойған жоқ, оның есебінде 3 гол бар. Сондай-ақ Нұрбол Бөкешов пен ресейлік Артем Лапшин айдыннан бос кетпей, бір-бір голдан соқты.
Ертең қос команда екінші кездесуін өткізеді.
Еске сала кетейік, бұдан бұрын допты хоккейден «Ақжайықтың» қазандық команданы екінші рет ұтқанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).